WILLEMSTAD.- Riba e wèpsait Fansided a aparesé un artíkulo interesante skirbí pa Marc Delucchi relashoná ku e ambishon di Hensley Meulens pa un dia ta manager den Major League Baseball. E artíkulo tin un kontenido hopi profundo i entre otro no ta ekskluí e posibilidat ku pa motibu di rasismo e yu di Kòrsou no ta haña e oportunidat ku e ta meresé, kontrario na otronan ku ‘from nowhere’ ta bira manager, pero ku un diferensia… nan ta blanku.
Esun responsabel pa e artíkulo, ta kuminsá na señalá ku timnan di MLB a kuminsá yena e kuponan ku tin pa manager, pero e eks-SF Giants su hitting i bench coach Hensley Meulens ketu bai ta poné un banda.
Meulens a kuminsá su karera komo coach den 2003 i a traha na kasi tur nivel di beisbòl profeshonal, pero solamente ku e no a haña e oportunidat pa bira manager. Miéntras ku e liga ta sigui kontratá manager- i ehekutivonan blanku, por bisa ku rasismo ta loke a pone ku e afro-latino di Kòrsou te ainda no a haña e oportunidat.
E dos managernan resien kontratá, A.J. Hinch i Tony La Russa ta figuranan hopi kritiká. Hinch a keda retirá pa Astros í suspendé pa temporada 2020 pa motibu di su envolvimentu den e skandal di hòrtamentu di seña. La Russa, kende no a manehá for di 2012, tin un historia di kritiká peloteronan di koló.
Ambos a manehá teamnan kampion di Seri Mundial i nan tin rèkòrt fuerte komo manager na nivel di MLB, loke Meulens no tin. Pero ta esei ta e problema, nunka el a haña oportunidat.
Hinch tabata pelotero aktivo te 2004. Diamondbacks a kontrat’é komo manager di Minor Leaue den 2005. Ougustus di mesun aña el a bira direktor di ‘player development’’ pa Arizona, un dje funshonnan mas prestigioso den ofisina di MLB.
Ménos ku 4 aña despues, Hinch a bira manager di D’backs, na edat di 34 aña. Nunka el a coach ni manehá na nivel profeshonal I su falta di eksperensia a demostrá esei. El a risibí retiro komo manager.
Opviamente el a haña un oportunidat serka Astros. E team riba tereno tabata eksitoso, pero tur hende sa kon Hinch a kaba. Awor na edat di 46 aña, Hinch ta haña un di tres oportunidat pa manehá un ekipo di MLB.
La Russa su karera komo manager a start despues di a kaba su karera komo pelotero na 1977. Su aña siguiente e tabata manager di ekipo Double-A di White Sox. Na final di temporada el a keda promové pa e MLB staff. Na final di 1979 el a bira full-time manager di White Sox, e tempu ei na edat di 34 aña.

..Meulens komo bench-coach di Mets. Téknikonan blanku sin eksperensia komo coach na nivel di MLB ta bira manager, miéntras ku ketu bai e yu di Kòrsou ta keda kòrtiku...

La Russa a bira parti di team kampion den tres seri Mundial (Atletics I Cardinals), un éksito ku no a bin sin un skandal di a bira kara pa uso di steroids.
Meulens tabata hitting coach di Giants durante di tres Seri Mundial bou manager Bruce Bochy. El a risibí promoshon komo bench coach den Bochy su dos último temporadanan. Den 2020 despues di Bochy su retiro, Meulens a bira bench coach pa Mets bou di Luis Rojas.
E último biaha ku Meulens tabata finalista pa MLB manager tabata den 2017, serka NY Yankees. Pero en bes di Meulens, Yankees a kontratá Boone (44), kende nunka promé a coach na ningun nivel di beisbòl profeshonal, i ta hende blanku.
Tres aña despues, ku tur su eksperensia, apénas nòmber di Hensley Meulens a zona komo kandidato pa bira manager. Tigers i White Sox ya a firma managernan ku trayekto hopi mas largu, i esei pa motibu ku Meulens nunka a haña e oportunidat.
Mientrastantu, realidat ta mustra ku managernan predominante blanku ta haña nan di dos i terser oportunidat promé ku Meulens a risibí su promé.