ORANJESTAD.- Herbert Horne a traha hinter su bida ku MetaCorp. El a wòrdu empleá pa e fundadó, Shon Eddy de Veer i a traha te dia ku e la baha ku penshon i tabata e último empleado di Shon Eddy. MetaCorp ta e empresa di mas bieu di Aruba i ta eksistí mas ku 100 aña.

Horne, manera tabata yam’e kariñosamente, no ta djis un penshonado di e kompania pasobra su storia ta identifiká ku e kultura di MetaCorp, den kual empleadonan ta forma un karera i ta krese den e kompania. Horne a kuminsá traha einan ku 18 aña di edat i a sigui te na momentu ku el a baha ku penshon. El a traha hinter su bida pa un solo kompania, a keda fiel i hasta despues di baha ku penshon, e tabata akudí na tur evento importante di “su” kompania.

Herbert Horne ta nasí na Sint Lucia dia 29 di aprel 1926 i a fayesé siman pasa, dia 29 di sèptèmber ku no ménos di 95 aña di edat. Ku e edat ei, Horne a konosé tur e direktornan for di Shon Eddy de Veer, sigui pa su yu Gerard “Shon” de Veer sigui pa su yu Eduardo de Veer i despues tambe su yu Eddie de Veer. Horne tabata e úniko èks-trahadó na bida ku a traha bou di tur e kuater generashonnan den e kompania.

I klaro, su relashon ku kompania no tabata tampoko di djis un trahadó mas, sino a bira parti di e famia di MetaCorp. Asina por menshoná ku Eduardo de Veer ta su padrino di matrimonio i komo tal, ta konsider’é famia. Huntu a lanta e kompania, a traha duru, a selebrá triunfonan i a lamentá frakasonan tambe, pero sèmper kara na laira i kla pa e siguiente reto.

Su storia ku MetaCorp a start ora ku Shon Eddy tabata di bishita na e Coney Island na San Nicolas, ku el a nota un mucha jong ta subi e kabaitu i despues baha den purá ora di kontrol, pa evitá ku e mester a paga. For di leu sintá den outo Shon Eddy a sigui e hazaña di e hoben i a tuma un desishon sorpresivo. El a baha fo’i su outo, kana bai na e kabaitunan i a duna Horne trabou mesora. El a hasié esun responsabel pa e kabaitunan pa garantisá ku ningun hende ta subi pòrnada. E storia ei a bai te na 2001, ora el a baha ku penshon ku no ménos di 48 aña di trabou fiel na MetaCorp.

Durante su kasi 50 añanan di empleo, Horne a traha den diferente kompania afiliá na MetaCorp pero e mayoria tabata ku ATCO. Un tempu el a traha den e negoshi di sine tambe, pasobra di bèrdat e tabata un “all around man” pasobra e semper tabata kla pa yuda unda ku tabatin mester di dje. Hasta despues ku el a baha ku penshon, e sèmper tabata yama pa kompartí un idea, sugirí un otro forma pa brinda mihó servisio i hasta kritiká den kaso ku algu no ta bon.

Pa MetaCorp por a alkansá 100 aña kontinuo di eksistensia, desde 1920 pa 2020, tabata nesesario pa por a konta ku empleadonan fiel manera Herbert Horne, ku a dediká nan alma na progreso di nan mes, di nan kompania y di Aruba. “Na henter su famia i na tur kolega, mi ta ekspresá palabranan di kondolensia i hopi forsa”, asina Eddie de Veer, direktor di MetaCorp, a finalisá bisando.