WILLEMSTAD.- ‘DEN E BEMBE’  ayera a kombersá ku Herman ‘Manchi’ Harms, esaki den kuadro dje echo ku Gobièrnu, lesa Minister van Heydoorn, a anunsiá ku lo e ta e persona enkargá pa organisá Karnaval 2023. ‘Manchi’ ta sintié sumamente honrá ku e eskoho.

‘Pa mi ta un honor inmenso di por a risibí e konfiansa pa mi kompania por tuma e reto pa organisá Karnaval 2023. E tabata un sentido di hopi emoshon pa mi. Komo karnavalista di trayektoria basta largu e ta algu masha masha bunita mes. E ta un sentido di responsabilidat inmenso pa por kumpli ku tur e deseonan di karnavalistanan i ‘stake holders’, asina Manchi a kuminsá splika.

Huntu ku mi partnernan

‘Si mi hasié mi no por hasié sin mi dos partnernan ‘in crime’, Quincy i Hyacinth Sintjago i henter e tim ku ta para tras di nos.

Tempu kòrtiku

Mirando e tempu kòrtiku ku nos tin pa selebrashon di Karnaval 2023 mi ta kere ku ta na su lugá pa nos sinta ku tantu Fundashon JAG, AGKK i Sektor di Kultura pa dialogá i mira kiko ta e kosnan ku nos por yega na kolaborá ku otro pa por tin un organisashon na nivel.

Despues ora e simposio tuma lugá, kaminda tur ‘stake holders’ tin nan input pa nos yega na un ‘beleidsplan – meerjaren termijn’ pa e ora ei nos komo organisashon ‘take over’ den su totalidat, organisá i krea un karnaval ku ta ‘self sustainable’ i ku lo bira un entidat riba su mes ku empleo durante henter aña i ku al final Gobièrnu no mester supsidiá Karnaval mas, pero ku e Karnaval lo ta un entidat para riba su pia’.

Finalmente Manchi a indiká ku e ta un reto sumamente grandi pero e ta sumamente honra di por ta forma parti i ta enkargá i responsabel pa e organisashon di Karnaval 2023.

Foto: Hyacinth, Manchi i Quincy Sintjago ...