WILLEMSTAD.- Ayera durante un konferensia di prensa, Federashon di Futbòl Kòrsou a introdusí e direktor tékniko nobo di nos selekshon nashonal kende ta Guus Hiddink. Tur esaki a bin despues ku mester a pasa promé durante henter e proseso pa yega na un akuerdo ku e èks direktor tékniko Remko Bicentini. Tabata siman pasá ku FFK, a entamá un kaso kontra di Bicentini pero e dos partidonan a yega na un akuerdo ku otro. Durante e konferensia di prensa, Hiddink a indiká ku apesar ku ta lamentabel no tin partidonan ta tumando lugá pa motibu di Coronavirus, e ta kontentu di ta na Kòrsou i ta realisando un trainingcamp di e selekshon nashonal di futbòl di Kòrsou. E ta kere ku e momentu aki tabata bon pa por konosé nos hungadónan tantu riba tereno komo pafó di tereno pero alabes evaluá nan tambe meskos riba ku pafó di tereno. El a elogiá Bicentini di por a subi Kòrsou riba ranking di FIFA di for di puestonan den 100 pa 80 i awor e selekshon ta kla pa sigui dal su siguiente stapnan. Aki 26 dia, e selekshon tin kompromiso kontra di British Virgin Islands i Hiddink pa aworakí no ta kere ku e selekshon ta kla ainda. E ta sinti falta di algun hungadó ku no tei aktualmente ku e selekshon pero tambe awor e ta den e fase di evaluá e hungadónan pa wak kon nan ta i den ki forma nan ta. E problema prinsipal di mayoria di e hungadónan den selekshon ta, ku nan no tin ekipo kual ta pone ku nan no ta hungando partidonan. Pues esei ta stroba nan tambe di ta den forma físikamente pa por partisipá ku e selekshon. Importante ta pa e direktor tékniko, ku nan ta bon físikamente. E tékniko di 74 aña, ta kere ku ainda refuersonan por bini pa e partido kontra di British Virgin Islands pero esaki por bira difísil pa logra. Tambe ku FFK ta den proseso aworakí, pa wak e hungadónan ku a hunga pa otro selekshon, por logra mira akshon pa nos selekshon nashonal. Te ainda si nan no a logra haña un desishon final di FIFA. Hiddinks a bisa tambe ku tin algun hungadó nobo ku ta bai partisipá den trainingnan pero no ke indiká ken spesífikamente. Segun e tékniko, mas despues lo anunsiá e nòmbernan despues ku hasi e evaluashonnan nesesario. Su intenshon no ta pa biba na Kòrsou permanentemente, pa motibu ku mayoria di nos hungadónan ta hunga rònt Oropa i Medio Oriente. Siendo na Oropa lo ta mihó pe pa evaluá e hungadónan i tei si dado kaso si nan tin mester di dje.