No tin luga pa tur den ‘Oranje’

WILLEMSTAD.- Na Hulanda prensa ta sigui ku basta interes e echo ku Guus Hiddink a keda enkargá ku selekshon nashonal di futbòl di Kòrsou. Un trabou ku manera a keda publiká, mester a start for di tres luna pasá pero a resultá ku e direktor tékniko di último añanan Remko Bicentini no a keda informá di forma korekto ku e ta keda remplasá.
Den entrevista ku FOX Sports, Hiddink a duna di konosé ku e ta spera ku pronto lo e por yama bonbiní na algun hungadó nobo. Na e momento aki su bista ta fihá riba algun integrante di Jong Oranje komo tambe algun di mas edat kendenan no ta bini na remarke pa e selekshon hulandes. Den e entrevista nòmbernan ku a keda menshoná kaba ta di Sontje Hansen i e rumannan Quinten i Jurrien Timber. Den mesun rosea, sinembargo, e tékniko a bisa di tin komprenshon pa e echo ku hóbennan di diesocho, diesnuebe i binti aña kendenan ainda ta mira un posibilidat pa hunga pa Hulanda, lo posponé nan desishon.
“Pero na momento ku nan sinti ku nan no ta forma parti dje promé grupo di 40 hungadó Oranje, nan lo buska un otro kaminda pa kana i asina mira kiko ta lo máksimo ku nan por logra”. Pa e motibu ei mes e no ta ekskluí ku e nòmbernan ariba menshoná pronto lo ta ku Kòrsou. Hiddink a referí na prinsipalmente e konkurensia ku ta enorme, pues hopi hóben hulandes ku e nivel pa yega den selekshon di Hulanda.

E nobenanan ei huntu ku nan agentenan i tambe mayornan, mester skohe kua kaminda nan lo subi. Pues tin posibilidat pa via-via nan yega Kopa Mundial. “Lo no ta fásil pa yega Kopa Mundial”, segun e tékniko ta rekonosé. “Promé bo tin ku hunga via pul pa yega e siguiente fasenan, pa despues start un pelea ku gigantenan manera Merka i Mexico. “Nos ta bai mira si ta logra, ami en todo kaso tin hopi smak den e trabou aki”, segun el a bisa. Pa e veterano tékniko ta su di kuater trabou den sinku aña. Den desèmber 2015 el a remplasá Jose Mourinho komo interim-coach di Chelsea. Esei a dura seis luna. Tres aña despues e tabata na China ku selekshon U-21, pero despues di un aña a keda retirá. Den yanüari dje ana’ki el a bira konsehero di PSV, pero e proyekto a kaba den un silensio. Na ougùstùs último a bira konosí ku e ta bira coach di selekshon di Kòrsou. Meskos ku den tempu di Patrick Kluivert, por spera ku na Hulanda i rònt mundu lo tin hopi interes pa mira kiko e veterano tékniko por logra. Pa Kòrsou esei ta un bon notisia, ya ku atenshon pa trabou di Guus Hiddink ta praktikamente igual na atenshon pa selekshon di Kòrsou.