ORANJESTAD.-Polis di Aruba ta informá ku awe mainta sentral di polis a haña notifikashon (05:31am) ku un outo lo mester a drenta laman na altura di Malmok. Mesora a dirigí un patruya polisial pa e sitio. Tambe a dirigí ambulans i brantwer pa e sitio.

Na yegada di e promé patruya a bin topa ku un testigu ku a bisa polis ku un outo lo a drenta awa i e no a wak niun hende sali for di awa.

E agentenan polisial no a duda i mesora tuma akshon, sin pensa dos bia nan a bai kontrolá si tin un hende ku por a keda pega den e outo. E agentenan a nota ku tin un outo den laman i un persona maskulino ainda ta den e vehíkulo, pero e no ta reakshonando. Sentral di polis a pidi asistensia di Kustwacht, i na nan yegada huntu ku polis nan a saka e kurpa sin bida, di un hende hòmber.

A pone kurpa sin bida riba e boto di Kustwacht i transport’é pa e pir di Hadicurari. Na e pir polis tékniko, dòkter Forénsiko i recherche a presentá na e sitio pa asina hasi nan investigashon. Pa 7:10 di mainta Dr. Scholten a konstatá morto di Jonathan Jeremy Jr. Wernet nase dia

3 febrüari 2004 na Aruba, di 21 aña di edat. Kuerpo Polisial ta manda palabra di profundo kondolensia na famia di e defuntu.