CARACAS, AP.- Direktor di Hospital di Klínika di Caracas, Miguel Salomon, a informá na The Associated Press ku un hóben di 17 aña a muri komo konsekuensia di un tiru kual el a haña den kabes, serka di manifestashonnan den e kapital venezolano. E hóben, identifiká komo Carlos Moreno, a fayesé despues di un operashon pa saka e bala di su kabes.
Masha hopi di Guardia Nashonal a lansa gas lakrimógeno pa purba plama míles di opositor ku tabata marcha den un di e avenidanan prinsipal na wèst di Caracas.
Hopi Guardia Nashonal ku ekipo antimotin a blòkia un di e kamindanan pa stroba opositornan di yega den sentro di Caracas.
Aktivistanan di derechi humano a manifestá tokante e situashon interno den Venezuela na Den Haag. Ku kolónan di bandera venezolano bisti, algun a mustra bòrchi pidiendo pa para e diktadura den e nashon suramerikano.
Presidente di Colombia, Juan Manuel Santos a publiká riba su kuenta di Twitter ku el a pidi su kansier pa hasi un petishon na sekretario general di Nashon Uni, Antonio Guterres pa “pone su atenshon riba e militarisashon preokupante di e sosiedat venezolano”.
