WILLEMSTAD.- Tres hóben futbolista dje ekipo C-Stars resientemente a keda di skout pa e ekipo hulandes SC Heerenveen. Medio aprel nan a partisipá na un stazje di training durante di un siman na Hulanda, di manera ku nan por a eksperensiá kon hóbennan di nan edat ta haña nan preparashon komo futbolista. Ta trata dje hóbennan Abel Visschers (10), Asher Ignecia (10) i Jay-drian Offerman (11).

Aki na Kòrsou e hóbennan ta bou direkshon di coachnan Kevin van Velzen i Ramiro Griffith. Tabata un oportunidat úniko pa nan por a demostrá nan kualidatnan futbolístiko i esei apesar di a haña nan mes den un klima friu. Ta e intenshon pa C-Stars i SC Heerenveen keda den kontakto ku otro i sigui traha riba desaroyo dje hóbennan.

Abel Visschers tabatin e siguiente komentario: “Mi tin 3 aña ta hunga bala ku C-Stars i ta defensa sentral. Tin biaha mi ta defensa parti robes òf drechi di tereno i gusta yuda den avanse. E training serka SC Heerenveen tabata intensivo, pero dushi. Nos a hasi vários ehersisio pa despues hunga un wega. Nos a keda bon risibí pa e coach i a haña unifòrm di Heerenveen. E hungadónan tabata hopi sosial. Mi ta haña nan mes bon ku C-Stars, pero ku algun hungadó ku sigur ta mas mihó. Nan tin bon kondishon i ta fuerte. Vários dje ehersisionan nos sa hasi aki na Kòrsou tambe. Dushi ku nos por a train ku U11 i U13, e weganan tabata duru.

Asher Ignecia: “M’a keda invitá pa SC Heerenveen pa un training na Hulanda. Sigur tabata un bon chèns pa demostrá kiko mi por riba tereno di wega. Pero tambe m’a siña hopi kon nan ta hunga bala, nan téknikanan i abilidat. Ta promé biaha ku m’a bai Hulanda. Lo mi sigui train pa mira si mi por bolbe haña un invitashon, sea di SC Heerenveen mes òf kualke otro ekipo”.

Jay-drian Offerman: “Ami ta delantero den C-Stars. Mi eksperensia ku SC Heerenveen tabata sumamente great. Training tabata duru, tèmpo basta haltu pero m’a duna tur di mi parti. “M’a siña hopi kos. E coachnan tabata pone preshon pa hasi tur kos riba tèmpo. E muchanan tabata ke sa di unda mi ta bin i nan tabata papia ku otro i bisa ku nos ta hunga bon na Kòrsou i p’esei nos a haña chèns pa bin train ku Heerenveen. “Mi deseo ta pa yega leu ku futbòl, lo mi sigui train i traha duru pa bai dilanti. Ta bon pa nos aki na Kòrsou por sigui pusha den lokual nos ta hasi, mas mucha por pasa den un eksperensia asina’ki”.