WILLEMSTAD.- Djadumingu último, a tuma lugá na Hòfi Fidel un homenahe na dos baluarte di Bándariba organisá pa ‘Fundashon Típikonan Uni Kuidando Herensia Musikal Kultural’.
E fundashon ku su vishon ta pa salbaguardiá nos Kultural musikal i ku tin komo mishon pa duna lès na hóbennan kon pa toka i baila nos ritmonan tradishonal manera Wals, Dansa, Mazurka i Tumba hasiendo uso di instrumèntnan manera Mandolin, Trés, Marimbula, Triángulo, Benta. Matrimonial i Gogorobí.
E baluartenan di Bándariba, Lilin Hersilia di Club Santa Rosa i Shon Ma di Bar Martins Oranjeboom a keda homenahiá durante di e atardi.
Direktor di Sektor di Kultura i Deporte, sra. Lisette Sambo-Velder a hasi entrega di plakat di mérito na ámbos homenahiado.
Un atardi musikal a kontinuá ku presentashon di 4 típiko, Típiko Pasa Bon, Típiko Pa Bo Gosa, Típiko Andrea i Típiko Elegansia. Kai òrgel ‘Cicilia’ di Winchi tambe a presentá huntu ku dj Fidel Andrea.
Riba potrètnan algun momento durante dje homenahe na e dos baluartenan di Bándariba.