WILLEMSTAD.- Ayera Fundashon J.A.G. a duna un homenahe na e baluarte di Karnaval 2018, Sr. Orlando Cuales i na Maduro & Curiel’s Bank, bo banko amigu ku a keda nombra komo un ‘Pilá’ pa Karnaval di Kòrsou. Den presensia di Minister di Kultura, Sra. Alcalá-Wallé i famia di Sr. Orlando Cuales a hasi entrega di un obra di arte masha bunita riba kua tin e kara di Sr. Cuales grabá riba dje. E miembro di gerensia di MCB, Sra. Ruthsella Jansen a risibí e plakat di mérito komo ‘Pilá’ di Karnaval di Kòrsou na man di Sra. Minister, Marylin Alcalá-Wallé. E plakat di MCB tabatin e karanan di Lio ‘Paps’ Capriles, ‘Chicu’ Capriles i Shon ‘Cha’ Capriles riba dje. Riba e fotonan ku ta kompaña e artíkulo nos por apresiá algun imágen durante dje evento.