WILLEMSTAD.- Rignald Maduro, bosero di AMAK a duna informashon riba e homenahe i e dos orkestanan ku lo presentá riba djabièrnè, 12 di febrüari den Festival Center.

HOMENAHE

Tres dje kompositornan ku tabatin un impakto grandi durante di 50 aña di Festival di Tumba, Rignald Recordino, Boy Dap i Harry Zimmerman lo keda honra ku presentashon spesial di 2 komposishon di kada kompositor.

AMAK a kombersá ku Rignald Recordino i tambe famia di tantu Boy Dap komo Harry Zimmerman. E piesanan ku lo keda presentá te ainda ta un sorpresa, pero loke si ta konosí ta ku e dos komposishonnan di Rignald Maduro ku a keda skohe lo keda interpretá pa Mr. Saab; e dos tumbanan di Boy Dap nan interpretashon lo ta na enkargo di Gibi Doran i Albertico Libiee a keda skohe pa famia Zimmerman pa interpretá e 2 komposishonnan di Harry ku lo keda presentá.

2 ORKESTA

Un orkesta di hóben, bou di direkshon di Gedion Chandler, lo ta enkargá pa kompañá e kantantenan.

Mas aleu, Rignald a informá ku Maestro Gregory Colina, e areglista ku mas areglo ganadó durante di e último dos dékadanan i tambe esun ku tin mas eksperensia den direkshon di orkestanan grandi lo tin e direkshon di e orkesta ‘All Star’.

AKSESO

Solamente artistanan ku ta forma parti di e orkesta, kolaboradornan di e komishon organisadó, trahadónan di e kompania di zonido, plantanan di televishon lo por ta presente riba e anochi final den Curaçao Festival Center, pues lo no permití entrada di públiko.