Hòrta outo i post e riba Tik Tok

ORANJESTAD.-Kuerpo polisial di Aruba ta informa ku a realisá vários detenshon relashoná ku ladronisia di outonan KIA. Ta asina ku den último luna Kuerpo Polisial di Aruba a konstatá ku tin basta hòrtamentu òf intento pa hòrta outonan, spesialmente marka KIA di e modèl Rio. KPA a tuma nota tambe ku malechornan ta purba di hòrta e KIA Sportage i tambe KIA Picanto purbando e mesun ‘modus operandi’.

Esaki ta un fenómeno ku a kuminsá na Aruba ora grupo di hóbennan a kuminsá hasi e “TikTok challenge”.

Dor di uza un ‘usb cable charger’ di telefòn nan ta start e outo enkuestion. E sospechoso ta graba su mes hasiendo e akto aki pa despues post e riba TikTok.

Ta asina ku departamento di Team Motorvoertuigen Criminaliteit (TMC ) ke konsientisá esnan ku tin e outo menshoná pa pone mas atenshon i prekoushon pa evitá ku e outo ta keda hòrta. Doñonan di e outonan por prevení dor di pone alarma òf tambe ‘stuurklem’.

Te ku awor e Team a detené por lo ménos 10 sospechoso relashoná ku e kasonan di ladronisia di outonan KIA Rio. E edat di persona detené ta entre 14 aña pa 21 aña.

Polis tin atenshon pa ku e fenómeno aki i ta avisá pa tur persona ku tin pensa di hasi esaki; ‘bo chèns ta grandi di keda gara i detené komo konsekuensia ku bo ta bai será. Korda ku esaki ta un delito i tin kastigu mará na dje.

Mayornan di e menor di edat ku partisipá den e delitu aki mester korda ku por pone nan responsabel pa e gastunan di e daño hasi na e outo komo tambe daño na tersero.

‘Mayornan papia ku boso yunan i splikanan e konsekuensia ku e “ Tik tok challenge” tin. NO ta solamente e yunan ta bai sera, pero lo pone mayor responsabel pa tur gastu envolvi!