WILLEMSTAD – E futbolista profeshonal yu di Kòrsou, Tahith Chong a hasi su debut ku e ekipo di Manchester United den un wega ku a keda empatá 1-1 ku Club America na Phoenix, Arizona. E direktor tékniko di ekipo, Jose Mourinho tabatin hopi elogio pa e futbolista yu di Kòrsou, Chong den su 30 minütnan ku el a hunga. Chong di 18 aña, kende temporada pasa a keda skohe komo e mihó futbolista hóben di Manchester United, tabata krusial den e gol di su ekipo pa igualá e wega na 1-1. Chong a impreshoná komo atakante riba ala drechi, e posishon 7, promé i despues di e gol. Mourinho ta kere ku e úniko limitashon te ainda pa Chong ta su físika pero a elogi’é pa su konfiansa. “E tabata bon, el a bin pa demostrá kiko e tin i na un momentu ku nos no tabatin delantero. Nos tabatin mester di unu ku por a krea wega i tuma un inisiativa, kual el a hasi. E akshon pa krusa e bala pa e gol tabata un akshon bunita. E tabata entusiasmá i a hunga ku konfiansa. Ora ku e tin kontakto di kurpa e ta pèrdè esaki pa motibu di su limitashon pero ora e pone e bala move i ataka un riba un, e tin kalidat. E ta un bon mucha,” asina Mourinho a bisa.

Jose Mourinho

Adishonalmente Mourinho a bisa ku e tin un plan pa Chong train mas tantu posibel ku e ekipo ya ku esei ta yuda ku su desaroyo pero e tin ku hunga unda e ta pertenesé, e tin ku hunga den akademia i desaroyo físikamente paso esei no ta kla ainda. E ta frágil, e ta un mucha ainda.” No mester lubidá ku Chong a pèrdè 10 luna di desaroyo despues di a sufri un leshon serio na su rudia aña pasa. Manchester United ta kuidadoso kuné i no kier pur’e bek.

Tahith Chong a bin Manchester United dos aña pasa yegando for di Feyenoord. Awor e ta keda mira komo e solushon eventualmente di e problema di ManU riba e posishon di ala drechi. Chong por hunga ámbos banda pero ta preferá na man drechi. E ta dribel e bala masha bon mes i ta ataka dirèkt ku ta hasié un hungadó peligroso.

Su kompañeronan di ekipo tampoko no tabata falta palabra pa duna elogio na Chong su debut ku e ekipo grandi ayera i fanátikonan ferviente di e ekipo tampoko no a keda atras. Palabranan manera, e futuro #7 pa MANU, spera ku e haña un oportunidat e temporada aki, ke prospekto. Den su karera den e organisashon di Manchester United, Chong tabatin 31 aparishon, 10 gol, 9 asistensia i 129 minüt di embolbimentu direkto ku gol.

Chong mester tin pasenshi pero sin duda un gran komienso segun analistanan di e ekipo ingles.