Hopi entusiasmo; 2 team di Beach Volley pa Weganan CAC

Deporte

Rumbo pa Barranquilla 2018

WILLEMSTAD.- Un team di beach volley femenino i un team maskulino t’esnan ku otro siman lo abordá avion rumbo pa Barranquilla, Colombia, pa kompetí den Weganan Sentroamerikano i di Karibe (CAC Games). Federashon Vòlibòl Kòrsou (FEVOKO) ta kontentu ku e oportunidat ku nan a haña, sigur si tene kuenta ku e ta presentá na momento ku nan ta preparando pa promové e deporte di beach volley aki na Kòrsou.

Samira Luis i Christine Anthony ta forma e team femenino, miéntras ku Gilbert Paulina i Quinten Anthony ta e integrantenan dje ekipo maskulino.

https://youtu.be/M5_25geLZ0M

Presidente di FEVOKO, Elmer Pablo, ta splika nan partisipashon. “Nos a risibí e grato notisia di a kai den e grupo di 24 pais pa beach volley, debí ku nos a partisipá na diferente torneo di NORCECA”. E partisipashon na torneonan ei a yuda pa Kòrsou akumulá sufisiente punto pa para na puesto 22 i esei a permití pa e team maskulino haña invitashon pa CAC. Un luna despues a surgi e sorpresa agradabel, na momento ku NORCECA a hasi e partisipashon na algun pais, entre nan Kòrsou, ku a surgi un puesto serka e damanan i ku e pais ku reakshoná promé ta hañ’é. FEVOKO dirèkt a reakshoná riba esei.

Elmer Pablo ta trese dilanti ku nan suerte relashoná ku e team femenino ta e echo ku Christine i Samira a finalisá nan estudio i nan ta di regreso na Kòrsou. Konsiderá e tòp vòlibolistanan femenino, no tabatin duda ku nan lo a forma e ekipo. FEVOKO a haña bon koperashon di FDOK pa nan por a hiba parti di nan preparashon na Ulanda.

Serka e kabayeronan, e duo formá pa Quinten Anthony i Gibi Paulina tabata e mihó den un torneo i komo tal a gana e derechi pa representá Kòrsou.

Geronimus St. Hilaire for di prinsipio a keda enkargá ku training dje teamnan, miéntras ku último 2 luna FEVOKO por a konta ku asistensia di un coach brasilero nivel 4 di FIV (Federashon Internashonal di Vòlibòl).

Pa FEVOKO e partisipashon di beach volley na CAC Games a yega na un tremendo momento.