WILLEMSTAD.- Ku hopi ansiedat alumno i dosentenan di skol speshal Marieta Alberto ta warda 23 di Novèmber yega pa nan tambe duna un presentashon durante di e Gospel and Love Concert, ku Fundashon Dun’é un Chèns ta organisá na Avila Beach Hotel.
E aktividat ta kuminsá 19.30 or.
E konsierto ta un evento pa rekoudá fondo pa e muchanan di e Skol, ku ta situá na Suffisant. E alumnonan  ta preparando pa duna un bunita presentashon.
Programa Dun’é un Chèns, e aña aki ta kumpli su 15 aniversario. Durante dje 15 añanan, Fundashon Dun’é un Chèns, pa medio di e Programa Dun’é Un Chèns, a yuda hendenan ménos pudiente den nos komunidat i tambe realisá soño di esnan ku ta den  nesesidat.
Fundashon Dun’é un Chèns ta konstatá ku e nesesidat pa duna yudansa awor ta mas grandi ku nunka. Ta e realidat aki ta motivá e fundashon pa sigui yuda.
Manera a bira un tradishon, den kuadro di selebrashon di su aniversario, Fundashon Dun’é un Chèns ta organisá su Konsierto. E rekoudashon di e fondonan ta destiná pa instansia i/òf organisashonnan den nos komunidat ku ta traha na bienestar di esnan den nesesidat.
Hotel Avila Beach lo ta transformá den un sitio ku ta reflehá amor ora ku e presentashon di e  ‘Love & Gospel Concert’,  tuma lugá dia 23 di novèmber 2019.
Lo tin presentashon di vários artista renombrá lokal.  Entre otro por menshoná: Tony Sherman, Ernest Willems, Ced Ride, Gerda Daal, Reinier Lijfrock, Tania i Lientje  Isenia, Liesje Lispier i Romeo Heije. Orkesta Dennis Aalse lo kompañá e artistanan.
Un atrakshon èkstra riba dia dje konsierto ta e vários premionan ku por gana. Lo rifa entre otro, Sèt di Sala, Kama i Matras di 2 persona, Tapeit, Sèt di pòrch, Kama Ariba Abou, mesa pa TV i Pasashi pa Panama.
Partisipando na e konsierto aki bo ta kontribuí na e fundraising di pa Skol Speshal Marieta Alberto, ku tin mester di e yudansa aki.
Karchinan ta optenibel na Mensing’s Caminada, Beep Beep, Van den Tweel i Avila Beach Hotèl. Pa mas informashon por yama: 523-5507.