WILLEMSTAD.- ‘DEN E BEMBE’ a komprondé ku tin masha interes pa partisipá den e sertámen di Miss Kòrsou.
E organisashon Coridja Stars Production ta enkargá e aña aki atrobe ku organisashon dje sertámen i segun nos por a komprondé próksimamente nan lo hasi anunsio ofisial dje sertámen.
Loke ku a tene e organisashon pendiente pa por anunsiá e sertámen tabata e anunsio di kambio di diferente regla di parti di e organisashon di Miss Universe International.
Esaki ta sumamente importante debí ku ta riba e reglamentu ta skohe e representante lokal i ta riba esaki tambe e preparashon di e kandidatanan ta tuma lugá.
For di Coridja Stars Production nos por a komprondé ku e interes a surpasá e kantidat di partisipantenan ku e organisashon a spera, pero na mes momentu ‘DEN E BEMBE’ a komprondé ku lo no bula 7 pa 8 partisipante.
Partisipashon di e kandidatanan ta grátis segun nos por a komprondé i ku ta e organisashon ta pèrkurá praktikamente tur kos.
Ainda e organisashon di Miss Universe International no a revelá unda e sertámen dje aña aki lo tuma lugá, nan ta pendiente pa mas tarda otro siman anunsiá esaki.
E organisashon lokal, Coridja Stars Production ta trahando kaba riba e sertámen lokal i manera nos a indiká kaba próksimamente nan lo organisá e presentashon ofisial dje sertámen lokal.