WILLEMSTAD.- Hopi lamento riba medionan sosial pa ku morto òf mihó bisa likidashon di e rapper Becholize ayera mardugá den Saliña.
Edrich Kopra alias rapper Becholize nasé na Kòrsou dia 26 di sèptèmber 1991, a pèrdè su bida ayera ora a basha bala riba dje. Segun konteo di polis, kasi 24 huls di bala a registrá na e sitio di insidente.
Alrededor di 02.35 ‘or, sentral di polis a dirigí un patruya na Lindberghweg, despues di a risibí informashon ku deskonosínan den un vehíkulo mester a los vários tiru dirigí riba un hòmber. E patruya ku a yega na e sitio a topa ku e hòmber víktima ku vários herida di bala rònt di su kurpa ku no tabata duna señal di bida.
For di un investigashon preliminar ku polis a realisá na e sitio a resultá, ku e víktima tabata para huntu ku mas persona ta kombersá. Diripiente vários suheto den un outo shinishi a kore yega i basha bala dirigí riba e víktima. Durante di e tiroteo aki un otro persona ku tabata huntu ku e víktima a risibí heridá pa bala na su brasa drechi.
Presentenan a hiba e hòmber víktima K.G.R. di 19 aña di edat pa poliklínika di SEHOS pa tratamentu médiko.
Un vehíkulo ku tabata para den e serkania tambe a haña dos perforashon di bala.
Dòkter di polis a konstatá morto di e hòmber Edrich Kopra. Riba òrdu di fiskal di Ministerio Públiko a konfiská e kurpa pa mas investigashon.
Polis a konfiská tantu e vehíkulo di e víktima komo esun ku a haña perforashon di bala pa mas investigashon.
Kontinuando ku e investigashon, riba kaminda pa rotònde Zegu direkshon pa aeropuerto tabatin un SUV na kandela paresido na esun ku tabata envolví den e tiroteo, polis a konfiská e fròt pa mas investigashon.
Segun rumornan persistente ku ta sirkulá, e chispa ku a kondusí na e likidashon aki tin di aber ku un problema ku a surgi den Nolly’s Place nèt den e último siman di aña 2016. Riba e dia ei un otro rapper di inisial R. ku ta konosí pa su kansionnan ku lírika ‘gangsta’ tabata bai kuminsá basha un rèp pa ‘diss’ Becholize, pero diripiente un suheto, no ta muchu kla si ta trata di un amigu di Becholize, a subi stage i kita mikrofon fo’i R. Hopi a spera ku R. lo no a aseptá e kos aki, pero el a sorprendé un i tur dor di keda masha trankil mes. E kantidat di krítikanan ku e rapper aki a risibí tabata enorme pasó hopi tabata di opinion ku tabata e momento pa e demostrá ku e ta un ‘real gangster’. Sinembargo afortunadamente e asuntu no a eskala.
Loke a sigui despues tabata masha hopi komentario/video riba Facebook kontra di R. E víktima Becholize i un kantidat di otro rapper mas, a produsí video kaminda nan tabata duna nan komentario ku palabranan fuerte den direkshon di R. Esaki ta duna di pensa ku likidashon di Becholize por ta vinkulá ku e asuntu aki.
Imro Zwerwer a bisa ku Polis ta na altura di e problema ku tabatin den Nolly’s Place i ta hasi e investigashon nesesario pa wak si e asesinato i esaki ta konkretamente konektá.
Awor tur kos ta den man di Kuerpo Polisial pa akumulá e evidensianan nesesario, pa asina saka na kla ken ta esnan ku realmente ta responsabel pa e likidashon aki. Palabra di fortalesa ta bai na famia di e defuntu.