WILLEMSTAD.- Djabièrnè anochi HOW Radio 90.9 FM a presentá e di dos edishon di “HOW Radio Christian Music Awards” ku a tuma lugá di forma virtual. Maske e evento tabata virtual, pueblo di Kòrsou a disfrutá engrande di loke e artistanan a presentá i e akohida tabata enorme.

Spesialmente den e tempunan ku nos ta bibando aden músika di alabansa i adorashon tin un lugá sentral i importante komo un medio pa sembra speransa den nos komunidat.

Meta di HOW Radio Christian Music Awards ta pa honra i duna rekonosementu na nos artistanan lokal, ku ta residensia na tur parti di mundu, pa e trabou ekselente ku nan ta desplegá den e área di músika Kristian.

Pa medio di voto di oyentenan di HOW Radio 90.9 FM i henter e pueblo di Kòrsou e artistanan lokal a risibí rekonosementu den 17 diferente kategoria, entre otro, “Worship Song of the Year”, “Krioyo Song of the Year”, “Music Video of the Year”, “Band of the Year”, “Male & Female Artist of the Year” i mas.

Riba e anochi aki tur e nominadonan a risibí un rekonosementu i e nominado ku a risibí mas voto, a haña un “award” den e kategoria ku el a keda nominá.

E anochi aki a konta tambe ku presentashonnan espektakular di nos artistanan lokal Kristian manera Aemy, Shelomi Doran-Bakhuis, Reuben van Lierop, Proskuneo, Andy Moes i tambe Nahliel direktamente for di Aruba.

Loke sigur a resaltá e anochi aki tabata e hermandat entre e artistanan ku tabata apoyá, selebrá i enkurashá otro pa sigui ku e bon trabou pa Señor den e área musikal. Tur e nominadonan a destaká ku nan produkshonnan popular riba nivel haltu i nan kansionnan tabata den esnan mas pidí na HOW Radio 90.9 FM.

“ Nos tin un reto pa nos artistanan pa e aña aki. Tin dos temporada sumamente importante ku nos ta selebrá komo Kristian. Esaki ta e temporada di Pasku di Resurekshon i Pasku di Nansementu. Pero no tin sufisiente kansion den nos propio idioma i original ku ta trata e dos temporadanan aki”.

HOW Radio ke reta nos artistanan lokal pa trese mas produkshon dediká na e temporadanan importante aki.

Di e forma aki HOW Radio 90.9 FM. ke kontribuí na stimulá nos músikonan lokal pa sigui krea produkshonnan na nivel haltu pa guia e pueblo den alabansa i adorashon i kompartí e mensahe di speransa ku nos komunidat i henter mundu.