BRNO.- Ku viktoria pa nòkout di 15-2 riba Kroasia, e selekshon di Reino Hulandes ta avansá pa kuart final di Kopa Oropa di beisbòl. Despues di tres bateadó, e ekipo di Reino Hulandes a bai ariba i a sa di anotá tres kareda den di promé inning mediante un hit di Juremi Profar, doblete di Ademar Rifaela i otro hit di Sicnarf Loopstok. Un inning despues tabata Ray-Patrick Didder ku ta konektá otro honron pa hasi e partido mesora 5 pa 0. Den di tres inning, e hulandesnan a sa di habri e partido kompletamente for di otro. Hitnan konektá den e inning ei tabata di Sicnarf Loopstok, Sharlon Schoop (doblete), Delano Selassa (kareda empuhá), Roger Bernadina (kareda empuhá), Ademar Rifaela (dos kareda empuhá) i Sicnarf Loopstok (doblete kareda empuhá). E picher habridó pa Reino Hulandes tabata Juan Carlos Sulbaran, kende práktikamente no tabata den problema niun momentu durante e partido. El a tira seis inning, permití seis hit, dos kareda, regalá un base por bola i a poncha seis bateadó. El a haña relevo di Eric Mendez pa sea e viktoria pa nòkout pa e selekshon di Reino Hulandes. Na bate Didder tabata di 5-3 ku tres anotá i kuater empuhá huntu ku un doblete i un honron, Loopstok tambe tabata grandi di 3-3 ku un anotá i dos empuhá ku un doblete i Delano Selassa di 4-3 ku tres anotá i un empuhá ku dos doblete. Ku e viktoria aki probablemente Reino Hulandes ta bai enfrentá Israel den kuart final i esaki lo tuma lugá djaweps awor. Riba kombinashon di fotonan, por mira algun akshon durante e partido di ayera.