Humphry Soriano Girigori Sr

Na Memoria di
Humphry Soriano Girigori Sr
1947 – 2021

E movementu koperativista di Kòrsou a pèrdè un Baluarte den persona di Humphry Girigori.
Un lider, un hòmber di karakter humilde di poko palabra, pero ku hopi bon vishon.
Un tékniko den elektrisidat ku a gana hopi rèspèt den su karera profeshonal di mas ku 40 aña na OGEM, KODELA i AQUALECTRA. Apesar di esaki e tabatin e kurashi di drenta e mundu finansiero di Credit Union OGEM komo tesorero na aña 1991, pa despues bira presidente. Pa hopi aña Humphry a yuda fortifiká e koperativa ku tabatin nesesidat di un maneho finansiero fuerte i trese esaki riba un nivel.
Awe por papia di un Koperativa di Spar i Krédito sólido ku ta brinda bon perspektiva pa su sosionan.
Humphry tabata un persona semper hopi trankil i hustu. E ser hende tabata hopi importante pe i nunka e ta pretendé di sa tur kos. Semper e ta konsultá ku ekspertonan, pa asina e por tuma e mihó desishon.
Pa hopi aña e tabata den direktiva di e organisashon “madre” di Koperativa di Spar i Krédito, FEKOSKAN. E tabata biba e ideologia koperativista di un forma profundo i den kuadro di esaki semper a trata di yuda e movementu koperativista tantu na Kòrsou komo Bonaire. (aktualmente BES). Tambe e tabata duna apoyo na organisashonnan koperativista di Caribe CCCU, Centro i Latino America (CCCA).
Tur su eks- koleganan di trabou, komo amigunan koperativista ta di luto,

Humphry, Danki, bo a kumpli ku bo mishon riba e mundu aki,
Sosegá na Pas.
Willemstad, 19 mei 2021.