BUDAPEST, HUNGRIA, AP.- Riu Danubio ta debolbiendo e kadavernan. Sambuyadó i ekiponan di búskeda ta rekuperando kadaver di e víktimanan di un choke entre un boto di turista i un krusero den kapital di Hungria.
Algun di e víktimanan a wòrdu deskubrí den fondo di e riu, ainda den e boto ku a senk despues di e choke. Otronan a wòrdu deskubrí na 132 kilometer leu di e sitio kaminda e aksidente a tuma lugá.
E boto, El Hableany tabatin 35 persona na momentu di e aksidente na Budapest. Funshonarionan a konfirmá 11 morto te ku djamars. Diesshete persona ta pèrdí ainda.
Ekiponan di búskeda i reskate a deskubrí e restunan di shete surkoreano, algun ora despues di e dalmentu entre e boto i Viking Sigyn, un krusero di 95 kabina ku tabata riba ruta pa Alemania. E boto a senk den 7 sekònde na pia di brùg Margit.
Sambuyadónan húngaro i surkoreano ta ehekutando e operashonnan di búskeda i reskate, pero esaki a wòrdu opstakulisá pa e koriente fuerte di Danubio, kual generalmente no tin muchu visibilidat bou di awa durante e temporadanan aki.
E minister húngaro di Interior Sandor Pinter a bisa ku Surkorea a aseptá e splikashon di Hungria ku e sambuyadónan no ta drenta den e boto ku a senk dor ku esaki ta un operashon demasiado peligroso pa nan.
