WILLEMSTAD.- Ayera Hunneley Felicia a pone un reakshon riba Facebook relashoná ku e situashon ku a presentá kaminda ta pendiente pa próksimamente tin un presentashon di un formashon musikal bou dje nòmber di ‘Mellowstreet’, di kua praktikamente tur músiko ta eks músikonan di e formashon musikal QSign-Mellowstreet.
‘DEN E BEMBE’ ta ‘quote’ loke ku Hunneley a publiká riba Facebook: “ Pa medio di e kanal aki ami Hunneley Felicia ke partisipá lo siguiente.
Mellowstreet ta un konsepto ku mi tin gran parti den dje komo kreador intelektual. I ami ta haña un falta di rèspèt hopi grandi na mi persona pa bin konstatá riba ret nan sosial ku ta bai tin un fiesta dia 30 di desèmber ku eks integrantenan di e formashon QSIGN Mellowstreet ku a disidí di yama nan mes Mellowstreet awendia.
Na ni un momento so ami Hunneley Felicia no a wòrdu aserká pa ni sikiera notifiká mi di e plan aki. Ma bin komprondé ku tin mas evento kaminda e tim aki lo toka.
Pa rèspèt na e eks integrantenan i e banda ku tabata na mi kurason kual ta Qsign Mellowstreet mi a kis pa no toka ningun di mi komposishonnan ku ma krea den Qsign ku Icons by Gio. Tambe ora ma pasa pa forma parti na Icons by Gio mi a bai ‘akkoord’ ku maneho di Icons By Gio ku e afsprak ku pa 1 aña largu mi lo no ‘perform’ ku niun banda otro pa garantisá un formashon sano di Icons By Gio. Ma notifiká tur eks integrante di Qsign di mi posishon i plannan pa futuro. Apesar ku e banda no ta eksistí mas i mi tabata un ‘freelancer’ mi a skohe pa duna rèspèt.
E idea tabata ku pa otro aña e kombinashon Qsign Mellowstreet huntu ku Icons by Gio lo mester a bira un dje gran kombinashonnan pa aña 2019. Lástimamente esaki lo keda na un plan.
Pasó pa ami loke a sosodé aki i e manera ku el a sosodé ta algu ku ta inaseptabel.
Pues pa kita tur duda na fanátikonan. Ami Hunneley Felicia no ta forma parti di e grupo ku ta yama su mes Mellowstreet awendia i mi lo no forma parti di Qsign Mellowstreet mas den futuro.
Danki na un i tur ku a ‘support’ mi semper semper di kurason! Danki na un i tur ku a kere den mi i mi komposishonnan ku tabata gran mayoria e ‘succes’ di Qsign Mellowstreet.
Esaki ta mi style”.