MERKA.- Kuater dia despues ku nan e risibí e kaso, e hurado di e huisio kontra di Bill Cosby pa abusu seksual ta tratando pa terminá un impase ku a surgi riba e kargonan ku tin kontra di e komediante kaminda ta tilde di a droga i agredí un dama seksualmente na 2004. E posibilidat ku lo anulá e huisio a krese mas apesar ku e hues a ordená e hurado pa sigui deliberá.
Ayera nochi 9’or e hurado a suspendé e deliberashon pa sigui ku esaki awe mainta.
E panel di hurado a deliberá pa mas o ménos 30 ora durante di kuater dia. Cosby di 79 aña tin tres kargo den su kontra. E kuerpo di hurado forma pa 7 hòmber i 5 muhé ta kedando di forma aislá den un hotèl. E kaso ta trata di un enkuentro seksual entre Cosby i Andrea Constand, 44 aña, na su kas den un siudat pafó di Filadelfia. Constand a bisa ku Cosby a dun’é píldora ku a poné sinti su mes turdí i despues di esaki el a abusá di dje seksualmente. E abogadonan di Cosby a bisa ku e i Constand tabata amante i nan tabata den un momento intimidat.