LONDON, REINO UNI, AFP.- Hustisia britániko a rechasá dos apelashon urgente kontra e plan kontroversial di gobièrnu di Boris Johnson pa manda migrantenan i solisitantenan di asilo ku a drenta e pais di forma ilegal pa Ruanda.
Un avion lo transportá e promé 8 migrantenan pa e ais afrikano. E meta di e plan ta pa demotivá yegadanan klandestino den e pais.
Despues ku e proyekto a wòrdu aprobá pa Korte di London djabièrnè, un sindikato di agentenan di inmigrashon i organisashonnan no gubernamental Care4Calaid i Detention Action, huntu ku vários demandante di asilo, a purba un segundo apelashon djaluna konsiderando e proyekto komo un “polítika ilegal”.
Sinembargo, meskos ku djabièrnè, tribunal a bolbe rechasá nan argumentonan, dunando e proyekto lus bèrdè.
E gobièrnu britániko a negoshá e plan algun luna pasá ku Ruanda, kual tin un hotèl disponibel a akohé 100 migrante.
Outoridatnan di e pais lo haña 157 mion dòler pa akohé e migrantenan i proveé un kaminda legal pa nan haña un kas i establesé nan mes permanentemente den e pais si nan a deseá, segun indikashon di e kansier di e pais afrikano, Vincent Biruta.
