BOGOTA (AFP).- Un korte na Colombia a ordená embargo riba un kas dje legendario eks kiper di selekshon di futbòl René Higuita, despues ku a determiná ku e propiedat a keda atkerí ku plaka di e ‘cartel’ di Pablo Escobar promé ku el a bira propiedat dje futbolista den 1992.

“El loco” Higuita, konosí mundialmente pa su akrobasianan ekséntriko i salidanan ku hopi riesgo for di gol, ta den sentro di un investigashon ku fiskalnan a start komo 12 aña pasá pa establesé e orígen di un kas ku el a kumpra den un bario luhoso di Medellin, e siudat kaminda el a nase.

Ku “maniobranan” i “firmanan falsu”, segun fiskal, a purba “na skonde kon a yega na e propiedat, entre oro ku vários transferensia pa finalmente e keda riba nòmber dje eks-futbolista”, un aña promé ku a eliminá Escobar, e baron di kokaina i e lider kriminal dje ‘cartel’ di Medellin.

E investigashon a determiná ku e kas na un promé instante a keda atkerí pa un persona kende su nòmber a aparesé komo kumpradó en bes dje rumannan William i Gerardo Moncada, miembronan dje grupo di narkotrafikantenan di Medellin asesiná riba òrdu di Escobar den 1992, estando e rumannan den prizòn.

“Ta puru koinsidensia, Higuera a bisa ayera den entrevista ku Blue Radio”. El a trese dilanti di ta víktima di e akontesimentunan aki, i ku e no tabata na altura di prosedensia dje propiedat i komo tal ta apelá e desishon.

Higuita a bira mundialmente famoso pa su atrapada di “skorpion”, ku ta e manera ku e tabata reakshoná riba tirunan, bulando ku su pechu abou i dos pianan patras na laria pa kue e bala. Pero tambe ta kòrd’é pa su skandalnan di uso di droga i su detenshon den 1993 despues di a bishitá Pablo Escobar den prizòn.