WILLEMSTAD.- ‘Nèt un bon piesa pa nos saka den fin di aña komo tur hende ta kasa den fin di aña’, esei tabata e promé reakshon di Brian Wawoe, dirigente di Hype, na momentu ku e kompositor Jahir Brown a present’é e piesa.
‘DEN E BEMBE’ a kombersá ku Jahir Brown kende a komponé i areglá ‘Dilanti Altar’, komposishon ku ta keda interpretá pa Anthony Pietersz.
‘Ma haña e inspirashon banda di 2 or di mardugá. E melodia tabata tan spesial ku ma kuminsá traha riba dje i ma kaba e piesa den kareda di 6.30 di mainta. Ma bai drumi i lanta i pone algun toke na e piesa i presentá esaki na Brian Wawoe. Despues djei nos a drenta studio di grabashon serka Xemio Jacobs kaminda nos a graba perkushon i tur loke tabatin mester. Dje forma ei e piesa a bira un realidat’, asina Jahir ta splika.
Jahir ta yama un danki na Angelo ‘Borrel’ Dopwell kende ta su ‘coach’ i ta gradisí Anthony Pietersz tambe ku semper a kere den su produkshonnan.
Finalmente Jahir a indiká ku mester keda pendiente pa e siguiente produkshon di Anthony ku ta ‘Ménos Drama’.
Sostené nos músikonan lokal!.