WILLEMSTAD.- Despues di basta espektativa ayera tardi e presentashon ofisial di e agrupashon musikal ‘Icons by Gio’ a tuma lugá.
Verney Jansen ayera tardi a splika ku for di 2 aña pasá e huntu ku su ruman Kenley Jansen a hiba kombersashon pa tuma ofer e maneho di e banda Gio despues di a plantia esaki na Gibi Doran i nan tio, Jose ‘Uti’ Gregorio, dfm. Awor e proyekto a bira un realidat ku e presentashon ofisial di ‘Icons by Gio’.
E tim di maneho di ‘Icons by Gio’ ta formá pa Verney Jansen, Lim Rosinda komo ‘road manager’ i Charles Alberto ku lo ta e persona enkargá ku merkadeo i relashon públiko di e banda. Gibi Doran komo fundadó di Gio lo tin e ròl di konsehero prinsipal dje banda.

MUSIKONAN
E núkleo prinsipal di Gio ta ku e banda. Nato Mingeli riba piano, Henry Emerenciana riba bas, Catan Carlon riba keyboard, Marcus Istatia riba konga, Juni Balentin riba drùms i Almir Faries riba perkushon.
Segun ‘DEN E BEMBE’ por a komprondé ta pendiente pa kaba di kontratá i atendé último detayenan ku e sekshon di brass ku lo konsistí di 2 trompèt i 2 trombon.

FRONT ICONS
E front di ‘Icons by Gio’ lo konsistí di 5 kantante, ayera a presentá 4 di nan: Hunneley Felicia, Amos Balentien, Stevens Daniel i Djuric Virginie. E di 5 kantante ku ta Ivanhoe Willems ta na Ulanda i ta pendiente pa e bin Kòrsou i inkorporá su mes den e banda.
‘DEN E BEMBE’ a komprondé ku Ivanhoe lo duna su aporte tambe na e produkshon musikal dje banda. Mané ta konosí ku Ivanhoe ta un músiko super talentoso.
E tim tékniko di ‘Icons’ ta formá pa Darren da Costa Gomez, Jeanric Ursula i Mitchel Eustatius.
‘Icons’ no a duna un fecha ainda kaminda nan lo debutá pero di informashon ku ‘DEN E BEMBE’ a logra di optené ta indiká ku e banda ta preparando pa drenta studio di grabashon kaminda tin algun komposishon kla pa wòrdu grabá.