WILLEMSTAD.- E preshon sin duda ta riba nan, e músikonan na vários okashon a sali for di porta grandi kompañando diferente Rei i Reina di Tumba tempu nan tabata forma parti di Gio Fuertisimo i último komo ‘Dejavu’. Den 2019 nan reto lo ta grandi awor komo músikonan di Icons by Gio. Icons by Gio ta presentá riba djaluna, 4 di febrüari 2019, e promé anochi preliminar. Icons lo tin e trabou pa kompaña Doña Elia Isenia, eks Reina di Tumba na 1991 ku ‘Pia pia mané un trambia’ kompaña pa Turbo, na 2002 ku ‘Awe’ kompaña pa Gio Fuertisimo i na 2010 ku ‘Mi pueblo a manda mi’ kompaña pa Gio Fuertisimo. Amos Balentin ta otro Rei di Tumba ku a karga e korona na 3 okashon: 2012 ‘Un humilde piedra’ kompañá pa ERA; 2015 ku ‘Mucha di Kaya’ kompañá pa O’Vega i na 2017 ku ‘Remente den stadion di SUBT’ ku kompañamentu di Dejavu. Djuric Virginie ta e di tres eks Rei di Tumba ku Icons ta bai kompaña, Djuric a karga e korona na 2013 ora ku el a gana Festival di Tumba ku e komposishon di Oko Dap ‘Wowo riba bo’ kompaña pa Gio Fuertisimo. E otro dos kantantenan ku Icons by Gio ta kompaña ta Lele Gonzalez ku ya den pasado a yega di klasifiká i Monica Mao Cheia ku tambe a yega di klasifiká. Un nota di atenshon ta e echo ku tur 5 kompositor di e tumbanan di Icons a yega di gana Festival di Tumba. Riba foto algun imágen durante di ensayo ayera nochi.