WILLEMSTAD.- E rifa entre gruponan hubenil pa bin na remarke pa animashon musikal di Icons by Gio pa Marcha Hubenil i Despedida Hubenil a keda efektuá ayera. E gruponan ku a resultá ganadó ta: Sweet Party Kids, The Bito’s i Little Twinkels. Despues ku e ganadónan a keda anunsiá, Shurendi Pieternella, lider di Sweet Party Kids a anunsiá ku e ta hasi donashon di su premio na e grupo Ambiente Hubenil, algu ku a kai na agrado di e públiko presente. Gibi Doran na nòmber di Icons by Gio a indiká ku e aporte ku e banda ta duna na Marcha Hubenil ta pasó e muchanan ta e relevo di nos Karnaval. ‘Nos ta kontribuí pa Karnaval ku hopi kariño i amor. Nos aporte ta yuda alimentá e relevo pa mañan ku Dios ke’, asina Gibi a terminá bisando. Riba foto nos por mira Verney Jansen i Gibi Doran di ‘Icons by Gio’ huntu ku representantenan di Sweet Party Kids, The Bito’s i Little Twinkels, potrèt ta saká promé ku Shurendi Pieternella a anunsiá ku nan ta otorgá e derechi na Ambiente Hubenil.