WILLEMSTAD.- Temporada di karnaval a kuminsá i ICONS ta kla pa duna fanátikonan bon músika i ambiente variá den numeroso Jump-In ku lo tin próksimamente.
Sinembargo, ta importante pa gerensia di ICONS aklará algun rumor insistente ku tin den farándula aktual. “Tin algun vershon eróneo ta bibando nan bida den farándula lokal i nan ta keda motivá dor di komentarionan riba retnan sosial. Nos ta kere ta bon pa di nos banda nos aklará algun detaye”, esaki di akuerdo ku gerensia di ICONS.
“Ya for di Desèmber 2019 e rumornan a inisiá,  i na promé instante nos a tuma esaki hopi ‘light’ pensando ku lo ta ‘kayente di kompetensia’ pero despues e rumornan a intensivá, i di ningun manera no ta nos estilo pa partisipá den un farándula negativo. For di inisio ICONS su lema a bisa ‘Good Vibes Only’ i esaki nos ta bib’é i nos ta manifest’é den nos toká i presentashonnan lokal i internashonal. Karnaval ta un fiesta di pueblo i ICONS ta un banda pa pueblo, esaki ta nifiká ku nos ta toka ku tur hende sin eksepshon. Si pa un òf otro motibu tin un banda ku no ke toka ku ICONS esei ta nan prerogativa. Nos ta habrí pa kombersá semper, esaki tabata e kaso den luna di desèmber tambe.”
ICONS a bin ta profilá tremendamente i ta gradisí fanátikonan na Kòrsou, Aruba, Boneiru i Hulanda pa nan sosten den 2019. E banda ya ta ensayando pa e diferente kompromiso ku tin pa temporada di karnaval i naturalmente ya a kuminsá kalentá pa Festival di Tumba.
Gerensia ta sigui splika ku e banda ta den kompetensia i ta deseá pa esaki ta sano i semper na benefisio di e fanátiko! Kompetensia ta mantené tur hende skèrpi i ta pèrkurá pa fanátikonan risibí e mihó kada bes di nobo.
Konklushon ta, ICONS ta ‘ready’ pa toka ku tur banda di esun mas grandi te na esun di mas chikitu.  Follow the good vibes i sigui ICONS riba Facebook/Instagram @iconscuracao Felis karnaval!