LONDON, INGLATERA.- Idris Elba a lanta e speransa di su fanátikonan i despues a destruí esaki.
E aktor britániko a generá yen spekulashon ku e lo ta e próksimo James Bond na momentu ku siman pasá el a ‘tweet’ un selfie ku e teksto ‘My name is Elba, Idris Elba’, dje forma aki usando e frase konosí di e presentashon di e agente 007.
Masha hopi fanátiko di Elba a multipliká e petishon pa e strea di ‘The Wire’ i ‘Luther’ ta e promé Bond koló skur, pero despues Elba a ninga di ta e susesor di Daniel Craig den e ròl.
Den un entrevista ku un kanal di televishon britániko a puntr’e si lo e ta e próksimo Bond, Elba a kontestá mesora ku no.
Djamars, Craig i e produktornan a anunsiá ku e direktor Danny Boyle a renunsiá debí na diferensia kreativo.