WILLEMSTAD.- E leyenda venezolano, Ilan Chester a yega Kòrsou ayera tardi i mesora a ofresé un konferensia di prensa na Jet Centre di aeropuerto. Ilan a enfatisá di ta kontentu di por bolbe presentá na Kòrsou i ku su orkesta kompletu. Manera el a indiká, su último presentashonnan tabata mas bien den un ambiente privá i pa Kòrsou e ta bolbe uni ku su orkesta pa duna un konsierto. Su repertorio manera e mes a indiká ta inkluí su éksitonan i kansionnan ku sentimentunan personal. Nataly Antonia, na nòmber dje organisadónan a splika ku nan ta masha kontentu ku por a yama Ilan Chester bon biní. E konsierto ku lo keda presentá mañan lo inkluí un pre-show ku presentashon di artistanan lokal hóben ku lo interpretá kansionnan ku a kousa impakto den dékada 80 i komienso di 90. E konsierto ta tuma lugá den e ouditorio di sede di PWFC i ta kuminsá pa 8 or di anochi. Karchinan pa ‘Solo Exitos Tour’ di Ilan Chester ta optenibel na puntonan di benta konosí i tambe na FunMiles.