MERKA.- ‘Imitadora’ e di dos sensio ku Romeo Santos ta promoshoná a logra di superá ‘Despacito’ despues ku esaki tabata 25 siman komo number 1 riba e lista di ‘Latin Airplay’ di e revista Billboard.
‘Imitadora’ ta e di dos sensio di e albùm nobo di e ‘Rei di Bachata’ titulá ‘Golden’ ku entrante djabièrnè awor, 21 di yüli lo ta disponibel. E tema ta un bachata den e estilo úniko di Romeo Santos.
Siman pasa Romeo Santos a duna un ‘preview’ di loke lo mester bira parti de videoclip di ‘Imitadora’ kaminda bo por mir’e komo un investigadó priva.
E kansion nobo aki di Romeo ta bira e di 12 kansion dje artista ku ta alkansá posishon number 1 riba e lista di ‘Latin Airplay’, dje forma aki logrando pa kombertí Romeo entre e promé tres artistanan ku tin mas # 1 den historia.
Awe djárason, Romeo Santos lo desvelá su figura den ‘wax’ den e museo di Madame Tussauds den e siudat di New York.