WILLEMSTAD.- Diskushon riba un posibel ‘coup’ riba radio a pone ku ayera mainta e persona tras di un ‘app group’ di músikonan a tuma e desishon di skibi su pensamentu riba facebook pa despues eliminá e ‘app group’.
‘DEN E BEMBE’ ayera nochi a kombersá ku un músiko ku ta forma parti dje ‘app group’ i tambe e persona inisiadó ‘administrator’ dje ‘app group’.
Gino Genaro, e inisiadó dje grupo riba WhatsApp a indiká ku den luna di òktober 2017 ku pèrmit di músikonan ku e konosé el a traha un grupo den WhatsApp pa primeramente uni músikonan i kompartí músika nobo i agènda di bandanan.
‘Awe mainta mi a skibi un ‘post’ riba facebook emoshonalmente. E konteksto kompletu di e grupo a ser kambiá pone ku te asta algun hende a bira personal ku otro. E grupo tabata konsistí di kasi 200 músiko i artista.
“A krea e persepshon ku e grupo lo kier a forma un ‘coup’ pa baha e direktiva di AMAK, esaki a bira mas un punto mas kayente despues di e evento Hak’e, pero esei no tabata e kaso. Músikonan en bèrdat a duna nan komentario despues di Hak’e sigur pa loke ta trata e trato ku nan a risibí”, asina Gino mihó konosí komo ‘Blowi’ a splika.
Festival di Tumba ta algu ku tur músiko stima, en bèrdat e tin algun ‘kinderziektes’, pero ta puntonan ku por ser atendé, segun Gino ta splika. Pa por trese un balanse den e informashon ku ta keda kompartí i e otro banda di medaya di AMAK, Gino ta splika ku el a hinka Chayenne den e grupo.
Despues dje evento di Hak’e Chayenne mes a tuma e desishon di bandoná e grupo.
Gino a sigui splika ku e tabata e punto sentral pa por komuniká ku AMAK, pero gewon nan no por yega otro.
Pa por a logra pa AMAK yega na mas miembro aktivo a trata pa buska informashon i konta e kantidat di músikonan ku no ta miembro i ku ta den e grupo pa por yega na un lista di músikonan interesá, e akto aki a ser katalogá komo un kontamentu di kabes pa basha e direktiva abou, loke no ta e kaso.
E puntonan ku e músikonan a trese dilanti pa loke ta trata Festival di Tumba ta entre otro e situashon dje infrastruktura, e trato, posibilidat pa músikonan drenta Red Carpet. Tur pues puntonan ku por keda diskutí durante di un reunion.
Un músiko ku ‘DEN E BEMBE’ a kombersá kuné ta indiká ku e proseso pa bira miembro ta un prosedura difísil i esaki tambe ta un punto ku lo kier a diskutí ku e direktiva di AMAK.

Kiko ta e issue?
Gino Genaro no ta komprondé kiko ta e problema. Nan no tin aspirashon di baha niun direktiva, solamente nan ke traha pa logra uni e músikonan.
Un dje puntonan ku a keda tres’é pa dilanti ta entre otro e echo ku AMAK no tin un registro di músikonan lokal. Den un reunion, e sekretario Giovanni Atalita a yega di indiká ku no tin un registrashon ‘up to date’. E no tin registrashon di e músikonan hóben i presisamente ku esaki e grupo lo por a yuda pa krea un base di registrashon aktual.
Mas aleu ‘DEN E BEMBE’ por a komprondé ku tin músikonan ku te asta a risibí amonestashon di nan doño di trabou, siendo ku tur loke ku ta keda ekspresá den e grupo ta algu ‘privá’.
Tumando henter e situashon na konsiderashon a pone ku Gino Genaro yega na e konklushon ku mihó e desmantelá e grupo, kada músiko bai reunion riba nan mes. E echo ku AMAK a kuminsá na asumí un posishon kontra dje grupo i mirando ku e grupo su intenshon niun momentu no ta pa trese malkontentu a pone yega na e desishon.
Gino ta boga pa wak e desaroyo dje organisashon. ‘Imposibel pa bai stèmpel e grupo komo algu malu, e grupo tin 2 aña. Ta difísil pa bai tumba Festival di Tumba. Gino ta di opinion ku tur tempu el a intermediá.
Te hasta a proponé pa forma un tim di músikonan pa presentá e puntonan di atenshon dje grupo durante di un reunion. Gino a enfatisá ku e no tin ambishon pa tuma mando di AMAK.
‘E evento di Hak’e a pone hopi músiko haña rabia riba AMAK. Tur hende ta karga Festival di Tumba na nan kurason i ta di opinion ku mester bini kambio. Mester yuda transformá e lugá i te asta e músikonan a pidi pa aserká Manchi pa apoyo’.

LAMENTA
Gino Genaro ta lamentá ku tur kos nos tin ku bati kibra pa despues lamentá ku nos tabatin algu bon. “Nos ta hopi negativo, ignorante i destruktivo. Pakiko si nos tin un kos ku nos stima nos tin ku kaba kuné, dikon no uni pa trese un Festival grandi. Músikonan ta duna di nan parti, pero nos mes ta bati kibra. Mi ta mira e potensial, nos por. AMAK no tei pa Festival di Tumba so!”.
Finalmente Gino a indiká ku si un kos mester pasa Feco, ken ta bai sigui ku Festival di Tumba?. Músikonan mester uni!.