WASHINGTON, AP.- Sekretario di prensa di Kas Blanku, Sean Spicer, a bisa ku e proposishon di apliká un impuesto di 20% na importashonnan di México ta simplemente un di e vários opshonnan ku ta wòrdu diskutí pa asina paga e muraya na frontera sùit.

Spicer a indiká ku presidente Donald Trump ainda no a tuma un desishon final tokante e manera ku Merka ta kubri e gastunan di e muraya.

Spicer a bisa ku algun ora promé, Trump kier a apliká 20% di importashon riba produktonan di México i a pronostiká ku esaki lo generá 10.000 mion dòler pa aña.

El a bisa na reporteronan na bordo di e avion presidensial ku Trump a debatí e plan ku lidernan di Kongreso i ku e kier inkluí e medida den un pakete di reforma fiskal integral.

Pero e hefe di gabinete di Trump, Reince Priebus a señalá ku e gobièrnu tin “vários opshon” pa paga e muraya.