CARTI(AFP).- Un komunidat indígena di Panamá a risibí kas i tera firme kaminda nan por biba for di despues ku nan mester a bandoná e isla karibense riba kua nan tabata pa motibu di menasa di nivel di laman debí na kambio di klima.
E presidente Laurentino Cortizo a inougurá un akto formal dje bario Nuevo Carti, den e área indígena di Guna Yala pa ubiká 1.200 habitante dje isla Cartí Sugdupu, situá na un distansia di 15 minüt ku boto for di kosta.
“E krísis di klima ku mundu ta bibando a obligá nos aki na Panamá pa hasi traslado for dje isla pa e urbanisashon di alrededor di 300 kas”, segun Cortizo.
E mandatario panameño, ku ta konkluí su mandato dia 1 di yüli benidero, a responsabilisá “paisnan desaroyá” pa e “krísis di klima ku mundu awor ta bibando”, e.o. pa motibu di produkshon di gas ku a afektá ‘ozon laag’.
“Mester kumpli ku e akuerdo di Paris, loke mundu no ta hasiendo i esei ta pone ku paisnan manera esun di nos, ku tambe ta den un situashon vulnerabel”, ta haña nos mes ku e problema di kresementu di nivel di laman”, segun e presidente panameño.
