WILLEMSTAD.- Relashoná ku Marcha di Seú Bándabou djadumingu 15 di aprel benidero, Fundashon Seú kier a informá tantu Lidernan di Grupo komo Públiko banda di kaminda, di e siguiente manera.
E marcha ta sali eksaktamente pa 1’or di atardi for di dilanti di e snèk na Hòfi Abou, miéntras ku e final lo ta na vèlt di bala na Barber. Vehíkulonan pisá mester ta presente for di 10’or di mainta, miéntras ku nan mester pasa obligatoriamente via di Santa Cruz bini pariba.
Na e snèk na Jan Donker (krusada Santa Cruz), lo tin un kùrmentu riguroso. Konvoi ku ta transportá grupo mester stashoná riba vèlt di Barber. Ta urgi tur Grupo pa ta presente na tempu, pa nan no kore riesgo di keda pafó di e Marcha.
Pa loke ta trata e distinguido públiko kantu di kaminda, ta konta e siguiente reglanan: No ta permití stashonamentu di vehíkulo riba asera riba Kaminda Próspero Royer for di Banko Maduro te Kaya Johannes Francisco. Den e kuadro aki tambe, ta urgi un i tur pa sigui indikashonnan di outoridat estriktamente.