COLOMBIA.- Un supuesto sertifikado di nasementu di un mucha kolombiano ta pasando rònt mundu pa motibu dje nòmber dje yu: ‘Netflix de Jesus Rodriguez Restrepo’.
Segun e sertifikado, e yu a nase dia 13 di mei 2018 na Antioquia, Colombia, serka di Medellín.
No ta e nòmber dje yu ta tópiko di kombersashon, pero e rason dikon e mayornan a duna e yu e nòmber, loke ta apart for dje popularidat dje plataforma digital di ‘streaming’ di televishon.
Na Merka e frase, ‘Netflix and Chill’, no ta dje ofensivo manera e ta zona. E konotashon ta ora bo bai wak e programashon ‘on demand’ di Netflix, loke pa hopi ta nifiká hasi sèks òf tene relashon. E or’ei si e mayornan di Netflix de Jesus a dun’é e nòmber ta pasó nan a kòrda e forma kon nan a konsebí e yu, un anochi mirando pelíkula riba Netflix.
Awó e pregunta ta kiko sr. Rodriguez i sra. Restrepo lo kontestá na momentu ku puntra nan kon nan a skohe e nòmber!.