WASHINGTON ( AP).- Presidente Barack Obama ayera a selebrá Dia di Independensia di Merka yamando bonbiní na mas o ménos binti sòldá ku resien a huramentá komo siudadanonan merikano, bisando ku e kontribushonnan ku ya nan a hasi ta suprayá e nesesidat ku Washington tin di logra un reforma migratorio integral.
‘ E inmigrashon t a fortalesé Merka’, asina Obama a bisa. ‘Inmigrashon ta hasi nos mas próspero. Inmigrashon ta pone Merka den posishon di liderazgo den siglo XXI’.
E 25 militarnan den servisio aktivo ku a risibí siudadania ayera a bin di 17 diferente pais, entre nan Mexico, Nigeria i Rusia.
Dilanti di un oudiensia di famianan i amigunan, e miembronan di e forsanan armá a ripití e Huramentu di Lealtat ku e sekretaria di Seguridat Nashonal, Janet Napolitano, a pronunsiá, den Sala Ost di Kas Blanku.
Obama a bisa ku e antesedentenan variá di esnan ku a huramentá ta ehèmpel di e tradishon bieu merikano di aseptá e inmigrantenan di rònt mundu riba su suela.
E presidente a menshoná un ratu e desishon ku su gobièrnu a tuma luna pasá di stòp di deportá e hóbennan ku a yega Merka tempu ku nan tabata mucha i ku a uni den ehérsito òf a bai universidat. Sin embargo, Obama a rekonosé ku tin mas trabou pa hasi pa alkansá un reforma kompleto di e sistema migratorio.
