WILLEMSTAD.- Dia 1e di yanüari mardugá despues di tiru a tuma lugá un insidente riba Schottegatweg Oost nèt den serkania di Club Vanilla.
E insidente aki a kaba den bashamentu di bala kual a spanta hopi hende ku tabata den e edifisio.
Gerensia di Vanilla ke klarifiká i refutá tur komentario ku ta indiká ku e bashamentu di bala a tuma lugá den e klup nokturno. Na ningun momentu tabatin niun peliger den e edifisio. E bashamentu di bala a tuma lugá parti pafó di e edifisio i NO paden.
“Nos ta lamentá profundamente ku ta plama informashon eróneo relashoná ku e insidente en kuestion.
Gerensia di Vanilla ke enfatisá, ku tur dia di nobo nos ta traha duru i invertí hopi riba e seguridat di tur nos klientenan. Esaki pa nos ta prioridat.
Mas aleu, nos ke hasi un yamada na komunidat kompletu ku ta sali pa dibertí den e dianan di fiesta , pa hasi esaki di forma sano.
Nos ta hasi nos máksimo pa trese ambiente dushi i un establesimentu di kalidat pa nos klientenan pero nos ta pidi pa di bèrdat tur ku sali i bishita Vanilla, hasi esaki puru pa pasa un ratu ameno ku otro.
Nos ta pidi un i tur enkarisidamente pa bin ku un komportashon positivo”.