WILLEMSTAD.- Preparashon ta tumando lugá pa e di 7 edishon di Curaçao International Film Festival Rotterdam ku lo tuma lugá di 11 pa 15 di aprel 2018.
Un dje preparashonnan ta e nominashon pelíkulanan dor di CIFFR pa e kompetensia di ‘Caribbean Shorts Competition’. Sineastanan di Kòrsou, Aruba, St. Maarten, Islanan BES i Sürnam ta keda konvoká pa inskribí nan pelíkula pa e kompetensia.
E kompetensia di pelíkula kòrtiku aki a originá despues ku un akuerdo di koperashon a keda firmá entre CIFFR i 6 festival di sine di renombre den Karibe i Mexico pa atkerí konosementu i eksperensia den promoshon di área pa realisá produkshon sinematográfiko pa medio di organisá entre otro organisashon di kompetensia, workshop i tambe interkambio di talentonan profeshonal.
E pelíkula ganadó di e promé kortometrahe di Karibe, 2017, ‘E yobida di ayera’ di e sineasta arubano, Armand Simon, a keda presentá na e festival di sine na Trinidad & Tobago i na Morelia, Mexico i durante dje siguiente lunanan lo keda presentá na otro festivalnan di sine ku ta forma parti dje kombenio.

Kompetensia
Sineastanan di Kòrsou, Aruba, St. Maarten, BES i Sürnam ta keda invitá pa tuma parti na e kompetensia i hasi entrega di un pelíkula (kortometrahe), ku un durashon minimal di 3 minüt i máksimo 20 minüt via di e wèpsait http://curacaoiffr.com/Competitions/caribbean-shorts-competition-2018. E inskripshon via di wèpsait ta posibel for di awor te ku 1 di mart 2018.
Pa e kompetensia di ‘Caribbean Shorts Competition’ kada un dje festivalnan partisipante ta nominá un pelíkula. E pelíkula ku lo keda skohe pa CIFFR ta bini di e partisipashon di sineastanan di Kòrsou, Aruba, St. Maarten, BES i Sürnam. Ku lo yega na un total di 7 pelíkula ku lo wòrdu nominá pa ‘Caribbean Shorts Awards’.

Caribbean Shorts Awards
Tur e 7 pelíkulanan ku keda nominá lo keda presentá na e públiko durante dje festival di CIFFR. Un hurado internashonal lo skohe e ganadó di ‘Caribbean Shorts Awards 2018’ ku lo keda anunsiá durante dje anochi di premiashon ku lo tuma lugá riba djasabra, 14 di aprel 2018.
E pelíkula ganadó lo keda presentá den e próksimo edishon di kada un dje festivalnan ku ta kolaborando: Festival Internacional del Nuevo Cine Latinoamericano de la Havana (Cuba), Festival de Cine Global Dominicano (Dominican Republic), Festival Régional et International du Cinéma de Guadeloupe, Rencontres Cinéma Martinique, Morelia International Film Festival (Mexico) i Trinidad & Tobago Film Festival.