WILLEMSTAD.- Pa e di 6 edishon di Curaçao International Film Festival Rotterdam (CIFFR) ku ta tuma lugá di djárason 5 aprel te djadumingu 9 aprel 2017, nos a modifiká e sètùp di e kompetensia anual di short film i e kompetensia a haña e nòmber di: Caribbean Shorts Competition.

Den aprel 2016, CIFFR a firma un akuerdo di koperashon ku seis pais di den region, kaminda tin festival di sine, p’asina interkambiá eksperensia i konosementu riba tereno di pelíkula dor di entre otro apoyá trahamentu di pelíkula i dor di organisá kompetensia, tayer i tambe pa interkambio di profeshonalnan talentoso. Ku mira riba esaki a kambia e sètùp di e kompetensia anual di short films CIFFR, p’asina laga nos talentonan lokal no solamente kompetí lokalmente, pero tambe ku trahadónan di sine internashonal. Nan ta kompitiendo, pa e pelíkula ganadó por partisipá den diferente festival di den region i Méhiko!

Caribbean Shorts Competitions

A invitá partisipantenan di Kòrsou, Aruba, St-Maarten, BES i Sürnam pa partisipá. Nan mester entregá un pelíkula (mínimo 3 minüt i maksimal 20 minüt) hasiendo uso di e formulario riba e wèpsait di CIFFR ( www.curacaoiffr.com ). Kontrali na edishonnan anterior, lo no pidi pa traha un pelíkula basá riba un tema òf género. Pelíkulanan komersial òf video musikal ta keda ekskluí.

Un hurado lo skohe un pelíkula ku lo sigui partisipá den e kompetensia Caribbean Shorts Award.

Kada un di e paisnan partisipante lo presentá un pelíkula den e kompetensia i komo tal lo tin 7 pelíkula nominá den e kompetensia Caribbean Shorts Award.

Caribbean Shorts Award

Tur pelíkula nominá lo pasa durante e festival di Sine. Un hurado internashonal lo saka e ganador di Caribbean Shorts Award 2017 riba djasabra 9 aprel 2017.

Lo pasa e pelíkula ganador den e siguiente edishon di festival di sine na e paisnan ku a firma e akuerdo di koperashon: Festival Internacional del Nuevo Cine Latinoamericano de la Havana (Cuba), Festival de Cine Global Dominicano (Dominican Republic), Festival Régional et International du Cinéma de Guadeloupe, Rencontres Cinéma Martinique, Morelia International Film Festival (México), Trinidad & Tobago Film Festival.

Nos ta pidi tur partisipante pa tuma bon nota di e reglanan di kompetensia. Ultimo dia pa manda bo pelíkula ta promé mart 2017.