WILLEMSTAD.- E aña aki e eksibishon ta tuma lugá riba djárason, 19 di desèmber i ta presentá obranan di studiantenan i artistanan lokal. Komo bónus lo bo por bishitá e eksibishon di ‘Henkes op Curaçao’ ku trabounan dje artista ulandes, Dolf Henkes huntu ku un kolekshon di obranan di artistanan internashonal ku ta den eksibishon den Galeria Esmeralda.
E artista lokal, Giovani Zanolino, kende aktualmente ta e ‘artista residente’ lo presentá un kolekshon di obranan ku  ta forma parti di su promé periodo di ‘residensia’ na IBB.
No pèrdè e oportunidat pa bin duna sosten na nos artistanan lokal hóben na momentu ku nan ta sigui krea i mehorá nan mes pa un futuro briante den e mundu artístiko.
E eksposishon manera indiká ta tuma lugá riba djárason, 19 di desèmber 2018, pa 7 or di anochi na Instituto Buena Bista, situá riba tereno di Klínika Capriles na Groot Kwartier.
Entrada ta grátis.