WILLEMSTAD.- Na nòmber di  di Tim di maneho i direktiva di Instituto pa Formashon musikal, tur e hóbennan di Junior All Star, dosentenan, kolaboradornan i mayornan, un danki di kurason, na Sr. Omar van der Dijs di Licores Maduro.
Un danki spesial tambe na Toni Halabi di Brakkeput Mei Mei, TeleCuraçao i medionan di publisidat kompleto ku tambe a kolaborá pa realisashon eksitoso di e programa.
Nos a apresiá tambe presensia di nos presidente di Parlamento, Sr. Junior Millerson,  ku a bin apoyá nos hóbennan.
Nos ta spera ku despues di e tremendo presentashon di nos hóbennan, entre nan esnan ku pa promé biaha a toka un “blaas instrument” huntu ku nan dosentenan den Junior All Star Orchestra, e portanan finansiero lo habri, pa e proyekto musikal di hóben, mas grandi i mas produktivo na Kòrsou por kontinuá.
Nos ta konsiente di e situashon finansiero di nos pais, pero si no ni invertí den formashon, e situashon den próksimo añanan lo por empeorá.
E hóbennan e aña aki, a demostrá durante aktividatnan grandi den 2017 manera,  Festival di Tumba grandi, Un Kanto pa Kòrsou, dia di Bandera, festival un kanto pa Boka St. Michiel, i e konsierto, Un regalo pa Pasku, ku nan ta kla pa enfrentá kualkier reto.
E konsepto pa laga muchanan siña muzik den grupo, ta un idea básiko di nos método di Akademia di Músika Maestro Errol el Toro Colina, ku a duna fruta i ku a eduká míles di hóben, durante último 12 aña.
Diferente di e studiantenan ku  a gradua den e promé parti di e formashon musikal i ku a preferá di bai forma parti di agrupashonnan musikal lokal , ta notabel den nos farándula.
Kòrsou su futuro musikal, pa lokual ta trata músikonan, bon prepará, ta garantisá.
Un biaha mas danki i nos ta sigui konta ku boso sosten.