WILLEMSTAD.- Parlamentario Gilbert ‘Gibi’ Doran ta bastante indigná pa e echo ku atrobe abitantenan den bisindario di un Hòfi, enkabesá pa un ulandes oropeo (makamba) ke laga sera un hòfi. Despues di a sera Hòfi Pachi Sprockel, Klup Sta. Rosa, hasi difísil pa Hòfi Biesheuvel por drai optimal, sera Hòfi Cow, Hòfi Agustin awó ta toka turno pa Hòfi Fidel situá na Sta. Catharina. Hòfi Fidel mayoria bia riba djadumingu tin fiesta ku ta kaba pa mas lat 11’or di anochi. Doran ta puntra dikon nos komo yu di tera, esta nos mandatarionan ta duna gustu na loke ulandesnan oropeo ta bin nos lugá i bin eksigí i pa kolmo algun yu di tera makaku ta djòin nan lubidando ku hòfi tambe ta forma parti di nos patrimonio nashonal, dikon no ta protehá e hòfi nan? “Ora nos bai Ulanda nos tin ku adaptá na nan kultura. Dikon nan no por bin aki, bin adaptá na nos kultura i tradishonnan? Mi ta urgi nos Minister di Hustisia pa no laga e hendenan aki su deseo prevalesé i atrobe kita un punta mas di nos orguyo i tira afó”, asina Gibi Doran a indiká splikando mas aleu ku e lo bai vigilá e desaroyo aki hopi djaserka.