WILLEMSTAD.- E ekipo di Inter Willemstad ayera nochi den Stadion dr. Antoine Maduro a logra un viktoria ku skor di 3-1 riba Hubentud Fortuna i asina a kue nan promé 3 puntonan den e sekshon pagá di nos futbòl lokal Liga MCB 2017.

Inter Willemstad den e wega di apertura di kampionato a kue un (1) punto kontra di e kampionnan di Centro Dominguito. Ayera nan ta graps 3 mas pa yega 4 punto.

E benjaminnan den e promé mitar di wega a hunga un futbòl hopi kordiná i bistoso p’asina logra kita e wega for di Hubentud Fortuna.

Ya den promé tempu di wega e muchanan di Inter Willemstad a anotá tur e 3 golnan di nan ekipo pa pone e wega 3-0. Tabata un dje atkisishonnan nobo di Willemstad,  Rudrick Pop, ku ta pone Inter Willemstad dilanti 1-0 na di 24 minüt.  Djis despues na di 31 minüt di wega Dexter Cecilia ta lòs un fusil ku e kiper di Hubentud Fortuna no por a hasi nada kuné pa hasi e wega 2-0.  Pa kompletá e kos, Stallone Isenia den porta di haftaim ta pone e wega na 3-0.

Den e di dos mitar Hubentud Fortuna a sali for di kamerin ku un otro intenshon i pensamentu pa ku e wega i a kuminsá hunga mas riba e hungadónan di Inter Willemstad i a duna nan masha tiki espasio pa krea hugada.  Esaki a pone ku Hubentud Fortuna por a ataka Willemstad muchu mas tantu.  Den un di e atakenan ei rèfri Juniel Adelina ta pita pa un pena máksimo pa Hubentud Fortuna kual a keda kobra pa Sandley Bito ku éksito, kòrtando e bentaha di Inter Willemstad 1-3.

Djei a sigui diferente otro atake di Hubentud Fortuna pero nan no ta logra anotá i e wega ta bin finalisá ku Inter Willemstad ganá ku skor di 3-1. Inter Willemstad ku e viktoria aki awor ta yega 4 punto i ta pasa pa e promé lugá di Liga MCB 2017 huntu ku Centro Dominguito, miéntras Hubentud Fortuna ta keda ku 1 punto den dos wega.