WILLEMSTAD.- Kas di Kultura ta invitá tur grupo Rítmiko Kultural ku a partisipá na tantu Kantadó Mayó komo Marcha di Seú 2018, na un reunion awe, djaluna 7 di mei 2018, pa 6’or atardi na Zona Kultural den teater Norman De Palm.
Esaki den kuadro pa duna informashon tokante kontinuashon di e Happy Hour Kultural i de paso pa yega na pensamentu nan unánime pa sigui karga i balorá nos ritmo seú en partikular i tur nos ritmo nan kultural.
Kas di Kultura sekshon músika ta kere ku nos ritmonan kultural manera e Seú, Tambú i Tumba, mester sigui zona henter aña i ta krea e posibilidat pa grupo nan por organisá i krea mas aktividat kultural pa duna realse na nos kultura musikal.
Kas di Kultura ta apresiá presensia di tur e gruponan rítmiko pa asina e informashon por yega serka un i tur. Pa mas informashon por tuma kontakto ku Sr. Rubertico Balentien na telefon 514-9444 òf via 462-2209.