TEHRAN, IRAN, AFP.- E minister iraní di Eksterior a atvertí Merka djadumingu pa e pais no desplegá su Marina den Karibe pa impedí ku Iran ta manda produktonan di petroli pa Venezuela.
Den un karta dirigí na e sekretario general di Nashon Uní Antonio Guterres, minister Mohamad Javad Zarif a atvertí ku “Merka por desplegá su Marina den Karibe pa purba intervení i interumpí transferensia di petroli pa Venezuela.
E minister a avisá ku kualkier akshon similar ta “ilegal i un forma di pirateria”, segun un komunikado di Ministerio di Eksterior iraní. Zarif a agregá ku Merka lo ta responsabel pa e “konsekuensianan di kualkier medida ilegal”.
Elliot Abrams di Departamento di Estado merikano a akusá Caracas di paga Iran ku oro pa kontribuí ku rekuperashon di su sektor di petroli, kual ta gravemente perhudiká.
