TEHRAN, AP.- E lidernan iraní a selebrá Aña Nobo Pérsiko djabièrnè ku e promesa di superá coronavirus i fortalesé e ekonomia. E tono tabata unu positivo apesar ku e Ministerio di Salú a anunsiá ku 149 víktima mas a muri, oumentando e total na 1.433 den e pais.
Iran ta luchando kontra e brote di mas grave den Medio Oriente, ku kasi 20.000 kaso konfirmá i a wòrdu kritiká ampliamente pa e forma slou kon outoridat a reakshoná riba e krísis.
E presidente, Hassan Rouhani, a selebrá e aña nobo konosí komo Nowruz primintiendo un mihó ekonomia. “Nos lo laga e coronavirus atras ku unidat, ku trabou duru i ku koperashon”, asina el a manifestá.
Rouhani a defendé e forma kon su gobièrnu a atendé ku e brote di coronavirus kontra krítikanan generalisá ku outoridat ta dura hopi largu. Otronan a bisa ku posiblemente outoridat a skonde e promé kasonan di infekshon promé ku esaki a ekspandé rápidamente den e pais kompleto.
Rouani a sigurá ku e gobièrnu su prioridat ta e pueblo su salú.
