HERUSALEM, INDEFINI, AFP.- Israel i Líbano a sera un akuerdo “históriko” ku mediashon di Merka pa resolvé un disputa bieu relashoná ku e paisnan su frontera marítimo. E akuerdo posiblemente lo kita blokeo di eksplotashon di rekursonan di gas i ta un etapa nobo pa e dos paisnan ku téknikamente ainda ta den guera.

E negosiashon a sufri vários sla desde ku a lansa esaki na 2020, pero a logra avansenan importante den e último simannan, mirando ku ámbos parti ta spera di haña mas entrada di e eksplotashon di gas den Mediteráneo.

Promé minister israelí, Yair Lapid a anunsiá e akuerdo sin duna mas detaye tokante su kontenido. E hefe di e delegashon di negosiashon israelí, Eyal Hulata, a bisa ku tur demanda di Israel a keda satisfasé.

Presidensia di Líbano a bisa di su parti ku e proposishon final ta satisfaktorio i ku ta wardando pa anunsiá e límitenan marítimo akordá mas pronto ku ta posibel.